أنا عايـش

محمد محمد علي جنيدي


أنا عايش .. أنا عايش

عشان خدمة

يدوب خدمة لكم إنتم بأدِّيها

أنا عايش .. أنا عايش

ومن إمته

سنين عمري براعيها

رويتها بدمِّي ما نسيتها

ولا ساعه ولا دقيقه

ولولا خدمتي فيكم

ومصلحه رزقها ليكم

وانا عايش ف. وسطيكم

بيتهيَّأ لي كان مُمكن

ما بين ثانيه وبين ثانيه

ألاقيني ف. قبضتكم

فولايه أو صُباع باميه

ومين مايدوق ماهينمشي

وهَمْ .. هَمْ ..هَمْ .. وتَكْلُوني

وبالمرَّه تهينوني

وتدُّوني على وشِّي

ومين يضرب ما هايمشي

وكام شلُّوط مايِمْنَعْشِي

ويا ريت يومها تكفيكم

وترضيكم عَمَايِلْكُم

أنا مُش بافْتِرِي بظنِّي

ولا تفكيري دا منِّي

دا مشهد طال على عيوني

شريط داير مدى سنيني

مِخَلِّيني أَدَوِّبْ دمعتي ف.عيني

واقول ليكم

لولاها خدمتي فيكم

ومصلحه رزقها ليكم

لكان الخوف على جنيهكم

يروح منكم على جوعي

وكام لقمه تِكَلِّفْكُم

ومسحة إيد على دموعي

وكاس ميَّه لِتِرْوني

وفَرْشَه وهِدْمَه تكسوني

بيتهيأ لي ساعتها

مدام أصبح مَلِيش لزمه

وهَعمل لِيكم مِيت أزمه

تقوموا لحلِّ يجمعكم

وتِتِّفْقُم على نهايه

نهاية دنيتي بنكم

هَقول ليكم على فكره

هَكون بيها أوام ذكرى

هَتسعدكم وتنسوني

يا ريت تِرْضُم توفقوني

أنا نهايتي تكون سوده

مَهيش زرقه

كخيل كبرتْ وراس طلقه

يدُوب طلقه

ف.طاخ واحده

أهي خِلْصِتْ

تمام خلصت

بقيت برَّه

من الدُّنيا اللي انا فيها

بقول ليكم واقول ليها

أنا عايش .. أنا عايش

عشان خدمه

براعيها وأرضيكم

وبا تمنَّى يا ريت منكم

ف. أخر الخدمه بأديكم

وراس طلقه تِطِيح منكم

هَترحمني وتشفيكم

وتِكْفِيكُم

سَمَاعْكُم صرختي فيكم

أنا عايش أنا عايش