عرش الجمال

شعر: مفيد نبزو

– سوريا –محردة-

**
سبحان الله الكونك حسن وجمال
وخلا السحر يرسم معانيكِ
وحطك ياروحي بعرش مملكة الجلال
وخلا القمر يحرس لياليكِ
غنج ودلال بيلبق عليك الدلال
كلك حلا والرب عاطيكِ
قومي اسمعي قلبي عليك مال
ودقات قلبي عم تناديك ِ
بدك يا عمري أنا ويا فرحة الآمال
بدك عيون القلب بهديكِ
وبدك شو بدك رندح الموال
وترقِّص الفرحة غنانيكِ
كلما رحيق العسل سلسل يا حلوة وسال
بخلِّي عذارى الهوى ترقص حواليكِ
بجيكِ ع صهوة فرس برمح مثل خَّيال
ويا ويل ويلو ترى البدو يعاديكِ
بدك لأطلع أنا لفوق أعلى جبال
وبدك لأنزل أنا بنزل بواديكِ
وبدك خيوط الشمس أحلى شال
من الشمس أحلى شال بهديكِ
عندي الكرم والناي والعرزال
والخمر عتقتوا بخوابيكِ
يا لابسة وموشحة بتوب الكمال
قلبي أنا خاتم بإ يديكِ
مازال قلب اللي تمنى نال
وهالعمر زورق ع شواطيكِ
عندي السعادة لا كنوز ومال
أنت فرحتي بهالدني كلا
وكل السعادة والفرح فيك
**