قبل يومين

الشاعر الفلسطيني
الزجال جمال الدله
أبوي أجا قبل يومـين من فلسطين لو تـــــــــــدرا

بقلو يابا كيف حالك إتشردق وغص بالعــــــــبرة

قلي يا إبني أظن إنو معك من حالنا فكــــــــــــرة

لكني لقيت العكس وعذرت إمك على الحــــــسرة

يا ريت إني ما خلفتك ولكن شاءت القــــــــــــدرة

بديت أندم لأني إرضيت اطاوعكم بهالـــــــــسفرة
وبدأ يروي وكأنو بلال بتعذب تحت صــــــــخرة

حالي كيف يا ولدي مثل فارس بلا مهـــــــــــــرة

هيرتزل جاب دباباته وهدمت دارنا الذكـــــــــــرى

وبحقدو خلع اّلزيتون ما خلاّ ولا شجـــــــــــــــرة

وتركت أختك مع الجرحى وإبن عمك مع الأسرى

وإمك زغردت لأخوك وللشهداء والثــــــــــــورة

وأخوك إستشهد ووصى وداعتك أختك الصـغرى

لا تنسى تجيبلها مريول تروح المدرسة تـــــــقرا

حالي كيف يا ولدي مثل فارس بلا مـــــــــــــهرة

عساك بتذكر التينات واللوزات والصـــــــــــبرة

وعساك بتذكر الخروب وزيتوناتـنا الخضــــــرا

**
مسح دمعات عن خدو إعتدل وتوسد بنـــــــــهرة

قلي يا إبن إفدي المسجد الأقصى وافدي قبة الصخرة

والقيامة حطها بعينيك وافدي المهد والــــــــعذرا

ما بتسمع كسر العظام بعزف ع الوتر جـــــــفرا

وانتوا بترقصوا ع الجرح ما فيش إحساس بالمرة؟

ما بدنا قروشكو خبوها للسهرات والشــــــــعرة

وليلى بتسكب الكاسات وقيس بيحتسي الخـــمرة

إنحسبتوا أسيادنا وصرنا بنحرث أرضكم سخرة

إن شئتوا بتبعثوا قرشين باقي فضلة الســـــــفرة

وبعض قروشكم وصلت لشيخ الحي والحـضرة

تفاجأنا بظرف يومين صارت خُشتو عمـــــــرة

وخلع ثوب الورع واصبح مثل فرعون بالكشرة

ووزع جزء ع أزلاموا وقال إتجاوزوا الفــــقرا
وبالصدفه دري موسى بعد ما خفت الغبــــــــرا

وصاح الناس يا موسى إنقذنا جوعنا إستشرى

ولع غيظهم لما دري موسى ودعوا الســــــــحرة

وصاروا يساوموا موسى على التمرات والجمرة

بسيطة إحنا تعودنا وأخذنا بالـــــــــــ فقر دورة

لكن .....
موسى جاي يافرعون مايخلي بلحيتك شعرة
حالي كيف يا ولدي مثل فارس بلا مــــــــــــهرة

صاروا بيدفنونا أحياء قبل نموت بالحـــــــــــفرة

وإنت جايي تعشمنا بدولة تعين الســـــــــــــــفرا

بكفي نوم يا عربان شدوا خيلكوا الضـــــــــمرة

وصيحوا بهيبة الفرسان واحكوا الحق... لو مـــرة

قبل هاليوم هاجرنا ونزحنا مرة اخـــــــــــــرى

ومتأكد إذا ما صحيتوا والله فيها من الوطن هجــرة

وساعتها إن لفينا هون أكلنا لحومكم خـــضراء
بتقلي ليش ياولدي علينا تشد د النـــــــــــــــبرة

لأنو الشجرة الما بتثمر وخشبها مسوس وناخر

بنقطعها وبنحرقها ووراها مية ألــــف عثــرة

الجنة ما بنقبلــــها إذا فيـــــــــــــها هوان وذل

ودار العز نسكنها لوإنها جهنم الحـــــــــــمرة

شاعر وكاتب فلسطيني