لأمي القدّيسة ولكل أم قدّيسة: حرّاجتك

د. إياد قحوش

نهارك سعيد بعيدك

وبيزيد
شوقي لدفوة غمرتك
بالعيد
وشو غمرتك
مسحة رسول
خيال
بيجلّد كتاب القلب تجليد

*

بالعيد
بشحد من صبح عرزال
صوتك
ندي .. وبزرنقو تغريد
بلملم صدى الماضي
وجع تمثال
من ضربة الإزميل باس الإيد

*

وكل ما بتجي
حرّاجتك ع البال
بتهبّ
ريحة هندبي من بعيد
متل الغيوم النازله ع حْبال
حبّ الشتي
ت تبوّس القرميد

*

وبيصير ع سنين الدهب
سلسال
عمري يشد بقونة التنهيد
متل السما
الفيها الجراس جبال
وبتدقها إيد الرياح رعيد

*
ألله ياأمي
و نهر موّال
عهد الطفوله

طاف عهد جديد
ألله ياأمي
ياأمي قبال
وجهك

الضحكه
بتنقلب قربان
وكاس الدمع
بيصير كاس نبيد