الماغوط.. أسطورة الصحرا

مفيد نبزو

وآه يا ماغوط يا أسطورة الصحرا
يامعتَّق الكلمات بخوابي الزمان
من فاطمة ومن مريم العدرا
في معك من حزن السما ألوان
فارس كنت ع صهوة خيالك
ما في حدا بهالليل بيطالك
وبكل ساحة في إلك ميدان
ع دروب غيرك تزرع قناديل
بالوقت نفس الوقت تتشَّلع
وبكل عتمة يشقشقوا مناديل
وبعدك ع هاك الدرب تتسكَّع
لمين بدك تزرع حروفك؟؟!
ولمين بدك تشرح ظروفك
لا تقول إنك صحوة الوجدان
ولاتقول إنك شاعر الحرمان
قول ضلك قول يا ماغوط:
يا حسرتي ويا لوعتي
ويا مصيبتي
لما الأرض غابة،
وتأنَّست فيها الوحوش توحَّش الإنسان
وآه يا ماغوط لو بتموت
من شعرك بتحرق خيوط العنكبوت
تا يحترق ويموت
وما يضل عندو بيوت
أنت وسنية* جروح
عم تنزف عتب
أنت وسنية بروح
مع كوخ القصب
يا ناي ضلَّك نوح رجَّفت القصب
وآه يا ماغوط يا منجم الألماس
يا صوت الدهب
يا عاصفة وزلزال يا جنون اللهب
يا ثورة البركان فجَّرها الغضب
مين غيرك مين قلي مين
شرد البوم وطفَّش الغربان
وعلَّقت ع صدر الوطن نيشان
وكتبت للتاريخ أسطورة
شفت الشمس طلعت من سطورا
وصحيت عروس الجان
ووقفت ع شط البحر قبطان
هاج البحر
عليت مواجو للسما
والواقفين كتار
يا ريت لو فيهن يردوا العاصفة،
ويا ريت فيهن يوقفوا الطوفان
*سنية: الشاعرة سنية صالح زوجة الشاعر محمد الماغوط