قصائد زجلية

مفيد نبزو

1

همسة ونظرة

كلمة زغيرة ما بتكفيني

وميعاد واحد ما بيوفيني

بدي يا حلوة تقعدي حدي

وتتبسمي وتطلَّعي فيني

همسة من شفافك بتحرقني

وهمسة من شفاقك بتشفيني

نظرة من عيونك بتشعلني

ونظرة من عيونك بتطفيني

2

صورة قلب بالنار

بحبك أنا وبيعرفو الأطيار

بحبك أنا وبيعرفو الأزهار

لا تقولي ع الهوى بكير

وبعدنا ع الحب لسا زغار

بحبك أنا وبتعرف النسمة

إن مرت ع شعرك مرتين بغار

بحبك أنا وبالقلب مرتسمة

صورة قلب عم يحترق بالنار

3

مضيفة حب

أنا للحب في عندي وظيفة

وبدي شي بنت حلوة ولطيفة

أنا طيار ع بلاد المحبة

وما فيني طير من غير المضيفة

4

أسطورة

كلما بسمع شي عصفور

عم بيغازل عصفورة

بجنينة ورد ومنثور

ع البركة والنافورة

وكم فراشة عم بتدور

بجناحاتا مسحورة

تتعلَّق بخيوط النور

وتلوِّن أحلى صورة

بكتب للعشاق سطور

وبعمل منها أسطورة

5

صيد الحجل

لمن شفتني خدودها احمرت خجل

مرقت وراحت خايفة تمشي بعجل

قلتلها يا حلوتي صيدك حلي

قربتِ صوبي وقرَّب عليك الأجل

ورميت طلقة رجعت الطلقة إلي

تاري الحجل بيصيد صياد الحجل

6

قرص النحل

قالو الحلو نقَّط عسل تمُّو

وع مبسمو النحلات شو التمُّو

وبعدو العسل والشهد ع أمُّو

واللي بيقطف عسل من أمُّو

ما عاد قرص النحل بيهمُّو

7

عمايل عنترة

يلي شفافك بالقطر متقطَّرة

وخصلات شعرك بالعطر متعطَّرة

اعطيني شي خصلة شعر من الشعر الحلو

ولعمل عمايل ما عملها عنترة