مفيد نبزو
من أب إلى ولده الأول
يا مجد بدعي ربّنا يحميكْ
لتشعشع بنورك أمانينا
ويكون صوت العبقرية فيكْ
وتنشر الفرحة حوالينا
بدنا يا ابني ع الوفا نربِّيكْ
لتزهِّر بغصنك أمانينا
وإلا ع درب الصبر مامنهديكْ
مهما الدني تطحن طواحينا
قول الصدق خلِّي الصدق يغنيكْ
ولا تقول كلمة قبل ما تزينا
قلنا مجد يا مجد منسمِّيكْ
وخلِّي الدني تخلخل موازينا
كل الجناين عطرها بتهديكْ
وبتفرش بأرضك رياحينا
سبحان الله بالحلا محلِّيكْ
اسمك مجد حلَّا أسامينا
طير الهنا ع جوانحو يعلِّيكْ
ويسجع حمام الدني غنانينا
وبجنينة الأحلام منغطِّيكْ
لتنام ع نغمة حساسينا
ولما النسمة بصوتها تصحِّيكْ
بتفرفشْ بريش الهنا فينا
ولما ملاك الطهر بيناغيكْ
كل الدني بصوتك تناغينا
ليست هناك تعليقات:
إرسال تعليق