ثلاث قصائد لمفيد نبزو

مفيد نبزو

بتجنني
ما بتذكري من كم سنه
هديتك يا حلوة سوسنه
ذكرى المحبة يا منى عمري
بهالعمر الهني
وأنت هديتيني البسمة بوقتها
وكلمة بحبك من شفايف ناطرة
تاتنجني
بتسوى الدني
وحياة عينيك الدني,
كل الدني
مابتذكري من كم سنه
كنا يا عمري زغار وكبرنا
وصرنا نحنّ بشوق ع هالولدنه
كبرنا سوى
وبعدك عيوني بتفتني
وبعدك بذوقك بالحلا
بتجنني

بتجنني
بتجنني

**
صيد الحجل
لمن شفتني خدودها احمرَّت خجَلْ
مرقتْ وراحتْ خايفة تمشي بعجَلْ
قلتلها يا حلوتي صيدك حلي
قرَّبتِ صوبي وقرَّب عليكِ الأجلْ
ورميت طلقة , رجعت الطلقة إلي
تاري الحجل بيصيد صياد الحجل
تاري الحجل بيصيد صياد الحجل

**

يا عود
مهداة للفنان الكبير وديع الصافي، حيَّاه الله، وأمد بعمره، وأسبغ عليه الصحة والعافية
عن مين بدي خبرك عن مين
أنت الفرح يا عود صدقني
يا ما عزفت أنغام وتلاحين
ومن بين أغلى الناس تسرقني

**
بتحزن معي بتدندن الألحان
و ع الفرح بترندح معي فرحان
وع الملتقى ع رجعة الخلان
بحسك بصوت الأوف سابقني

**
وإن فارقوا بتتذكرالملقى
وبتحترق من لوعة الحرقة
وبريشتك عم تدمع الفرقة
تعزف نوى علِّي مفارقني

**
ويا ما أنا من رقتك حنَّيت
ويا ما بصوتك للدني غنَّيت
ويا ما ابتهلت وللسما صلَّيت
وصارت نجوم السما تعانقني

**
علَّات جوى القلب ما بتروح
إلا بصوتك يا وليف الروح
من كل ما في ضيق ما في جروح
ما بحس بعدك شي مضايقني

**
عن مين بدي خبرك يا عود
وهالعمر كلو قطفتين وعود
بكرا على تراب الأرض منعود
ضلَّك وفي وضلَّك مرافقني