مفيد نبزو
كان للقصيدة حضورها بشموخ ،لحضور الأرزة الشامخة، عملاق الطرب والفن ، الكبير تاريخاً وفناً وتواضعاً الدكتور وديع الصافي الذي معه كنت وله قلت: 14- 8- آب- 2005 - في سوريا:
يا أرض قومي استقبلي حبابكْ
جايي وديع يبوِّس ترابكْ
جايي رسول الفن تاريخ الوجودْ
يزرع حروف الشمس بكتابكْ
من طلّ وجهو فتَّحتْ كل الورودْ
وعرَّش الياسمين ع بوابكْ
***
يا أرض غنِّي ويا نجوم تزيَّني
جايي الصافي ربوعنا يزورا
مطرح ما غنَّى جبالنا هزّ الدني
وغنَّى يا ريس هيَّج بحورا
أرزة شموخ العزّ لا ما بتنحني
وصوت الهرم بيضلّ أسطوره
***
ولبسوا الغباني مع هوى الوديان
يا فرحة بلادي
لبسوا الغباني مع هوى الوديان
يا نشوة بلادي
وبحّة قصب منجيرة الرعيان
تصدح بهالوادي
وعمرو الطرب والفرح لا ما كان
لولا أبو فادي
***
ويا سما جايي اليوم لعنَّا قمرْ
تاريخ فنو بألف قلعة من حجرْ
وحروف اسمو متل زخات المطرْ
اشتقنا ع صوتو يرندح بنقرة وتر
ونقول للصافي: يا أهلا ومرحبا
إلا بصوتك ما حلي بعمرو السهر
إلا بصوتك ما حلي بعمرو السهر
إلا بصوتك ما حلي بعمرو السهر
ليست هناك تعليقات:
إرسال تعليق