فيروز

مفيد نبزو

- محردة- سوريا-
إلى السيدة فيروز بدون ألقاب

متل الشمس طلَّيت من بكيرْ
فيَّقتْ كل الناس
ما كان عندي غير حلم زغيرْ
لا في دهب عندي ولا الماس
هديت الدني وشو هديتها
نغمة فرح حبيتها
غنيتها وصليتها
بإيمان وبإحساس
بحس الطبيعة بتسمعوا
وبترندح بصوتا معو
يا ناس ع الأرض ارجعوا
خلُّوا العقل بالراس
يمكن الفرَّق فرح ع هالدني كلا
علَّق شموع الأمل من عتمتو وصلَّى
زفَّ الدني سرّ القداسة، وبالفرح علا
يمكن حزين وشرب مرّ الكاس
متل الشمس طلِّيتْ
والشمس إلها غروبْ
يا ريت شو يا ريتْ
عمرا ما إلها دروبْ
كنا قلوب ببيتْ
لا تهربي يا قلوبْ
شو كار لو مرَّيتْ
والبيت ما في ناس
وقنديلنا بلا زيتْ
وبالسقف كان معشَّش سنونو
واليوم صار معشَّش الوسواس
يا بيتنا حنَّيتْ
شوف الحمام مزيَّن براجك
واركع تبوس الحجر بدراجك
الحجار يلي معمَّرة بإيد الزمن
وحياة الله جبينها بينباس
متل الشمس طلَّيتْ هالطلِّة
وحبَّيتْ اسقي بدمعتي الفلِّة
وسألت هاك الروزنة، وين صارت الغلِّة
شهقتْ وقالت يا زمن يا مقطَّع الأنفاس
((تخمين راحت حلوة الحلوين
وما ضل في غيري حدا تخمين))
لا شجرة الياسمين بعدا مورَّقة
ولا الزَّنبقة ، ولا غصن حبّ الآس
ضلَّك مزهَّر فرحْ

يا حبنا لا تروحْ
هالصوت يلي انجرحْ

عطَّر قلب مجروحْ
زرعت المسا بالحبقْ

سقيتْ الأملْ بدموعْ
قديش شمع احترقْ

ما بتنطفي يا شموعْ
بكير زفّ الندى

ع دروب أحلى دروب
وشحرور رفّ وشدا

ينشر صدى الغروب:
يا حارس الليل خفِّف وحدتي وحشاي
نار اللظى أشعلتْ جوى القلب وحشاي
يا ليل وين الأنس صار الأنس وحشاي
مالي بليلي سوى نجوم السما حرَّاس
متل الشمس طلَّيت من بكير

فيَّقت كل الناس