قومي يا ليلى

شعر:مفيد نبزو-
سوريا- محردة-

**
قومي يا ليلى نزور ضيعتنا
ال ع حبها من صغر ربتنا
هونيك حدّّ المصطبة والبير
يا ما ليالي الغزل جمعتنا

**
ياما غزلنا وبالهوى مغزالنا
من الفل وغصون الحبق آمالنا
ما بتذْكِري الوقفات بليالي الهنا
قديش غنى الطير ع موالنا

**

وتذكَّري العاصي ,الباشِّيه

الطاحون تطحن قمح ع الميِّه
قومي يا ليلى نعيدها ع البال
ونتذَّكر الماضي بحنِّية

**
قومي يا ليلى نزور عاصينا
ال ع ميتو الصافي سوى ربينا
وتذكَّري قديش فوق الشير
ع الحب وليالي الهوى حكينا

**
وبكير بدنا نزور هالكرمات
ال بتبوس عناقيدهاالنسمات
ال بينَّقرا الحسون من بكير
ت ينقِّطوا من شفايفا البسمات

**
وتذكِّري بالعيد شو كنا
وعرعيش بالدبكات شو غنى
لما بصوتو يشوبش الشابوش
تفتِّقْ نجوم الميجنا عنا

**
ليلى يا ليلى هيك طبع بلادنا
ربينا تعلَّمنا الوفا من جدادنا
قومي نرش زهور ع دروب الزغار
ونعلم دروب المحبة ولادنا
************
الباشيه :اسم مكان على العاصي,كان
فيه طاحونة قديمة تدور على الماء
**عرعيش :شخصية شعبية من محردة
كان يُذهِّبُ الأعياد,ويبعثُ الفرح بأغانيه ومرحه
************
مرقت سنة
مرقت سنة والناس زعلوا ع السنة
وبعدي أنا فرحان
بكرا بيخلص عام وبتخلق سنة
بترندح الأ لحان
هُّروا يا ورقات الصفر هُّروا
من شجرة الأيام
ويا طيور من قفص الدني فرُّوا
غنُّوا مع الأحلام
يا حب عنا عيدْ

والعيدْ عام جديدْ
منزرع شفافك حبقْ

لو تقطف مواعيدْ
خلوا الدني يغزل سحر مغزالها
حلوة الدني بنهداتها وآمالها
بمزمزة كاس معتَّقة وبحَّة قصب موَّالها
أحلى سنة لما السنة بتخلق سنة
كل الدني بتقول يا نيالها
مرقت سنة والناس زعلوا ع السنة
وبعدي أنا فرحان
شو همَّني ان غرقت سنة
وضاعتْ مع الطوفان
وشو همَّني ان علقت سنة
بمخالب النسيان
وتقطعوا وتار الزمن
من جوقة الصاحي وبعدي أنا سكران
كلما بيسكر عام رح تخلق سنة
مع كل قطرة ندي وزهرة بيلسان
ونعود نسرح مع الراعي بهالقطيع
فوق الجبال وبين هالوديان