إلى ليلى

شعر جورج منصور

ـ1ـ
ليلى .. بعد ما انطرتها مدِّه
وصلت وورد غْلافها مندّي
هيدي عُصارَه من قلب إنسان
بْيِضمُر لَكلّ النّاس الِمودِّه
هيدي عشيقة شاعر وفنّان
قلب أبيض فوق مسودِّه
ما بتكتب غير عن لبنان
وبتطالب بحقّو ومحتدِّه
صوتو دوي .. وصوت الشعر رنّان
يا ويل كل ظالـم ومتعدّي
عَ ( ليلتين ) بمكتبو سهران
وليلى ع ( ليلى ) مش عَمِ يْبَدّي
للأوّلي بيقلّها : ولهانْ
وللتّانيِه بيقلّها : كوني
ثورة مواهب .. متل ما بدّي
ـ2ـ
بصفحات ( ليلى ) قريت خفّة دمّ
رجعت تمشّي الشعر بِـ دمّي
وشربل بيحب ( الليلتين ) اهتمّ
وكلّ ليله وفي لها مهمّه
ليلى .. اللي بيقلاّ : يا بنت العمّ
( وليلى ) البيقلاّ : فرّجي همّي
عَ قْبالْ ما ليلى تصفّي أمّ
( وليلى ) .. تصفّي فوق بالقمّه