مفيد نبزو
محردة
من هذه الضيعة المزروعة على أكتاف العاصي ، والمشهورة بماضيها المضيء
لا بد من حروف العطر والضوء والحنين
إنها الذكريات ، ذكريات تطلُّ من نافذة الشوق،
لترسم لوحة الإنسان الذي لا نزال امتداداً له بالخير والسحر والجمال
**
لمن نقور طير الحب
ع شبابيك الضيعة الحلوة
قلنا هي هيِّ ضيعتنا،
وهي رسمتها
وبعدا شبابيكا هالحلوة
ع الشمس بتشلح نظرتها
**
ولما تبسم تم الليل
ونقَّط قطراتو
ورذرذها ع ضيعتنا،
قلنا هي هيِّ ضيعتنا،
وهي قطرات المي اللي بتنوفر من بسمتها
**
ولمن فاح الزنبق عطرو
من جدولة هاك الحلوة السمرا
قلنا هالحلوة حلوتنا ،
وهالجدولة المرمية ع كتاف الخضرة جدولتها
**
ولمن غنّى الصبح غناني
ع الضيعة الحلوة المسحورة بمحبتها
قلنا هالضيعة ضيعتنا ، وهالغنية غنيتها
**
ولمن طلِّت شفت الحلوة ،
والغوازي بحطاطتها،
وعرفت الزي بقبعتها،
ودرَّاعتها ،
وصفِّيتها
**
ولما التمّ الفل ومال ،
وشلح قرنفل حد العين
يفرِّش ع طوارف نبعتنا،
قلنا هالمية ميتنا،
وهالضيعة الحلوة ضيعتنا ،
من ميتها ومن نبعتها،
ومن هالأرض اللي بتعانق في خضرتها
الشمس الخلقت مرة وحدة من تربتها
وكل طيور العين ال رجعت من غربتها
رجعت ع بيادر حنطتها
وبدها تغني غنيتها:
بضيعتنا الهوى بيعشق وردها
ونهر الكان عصيانا وردها
سقاها ميتو العاصي وردها
غنية كنوزها مواسم دهب
**
يا طيور الغربة يا طيور
زهور بلادك أحلى زهور
ونجوما ال بتنادي دوم
عودي من الظلمة للنور
**
عودي للأرض المرمية
بين الشمس وبين المية
وغنيلا أحلى غنية
ترقِّص شتلات المنتور
**
يا طيور الغربة العنباتا
حمرو فيهن هالحبَّات
ما اشتقتو لليالي الصيف
والقعدة بكوخ الناطور
**
نحنا يا طيور رجعنا
وبعد الغربة تجمَّعنا
وغرَّد هالبلبل معنا
وزقزق بالملقى العصفور
يا طيور الغربة يا طيور
**
ليست هناك تعليقات:
إرسال تعليق