مفيد نبزو
- القصيدة التي ألقاها مفيد نبزو في معمودية ولده وديع ، وكان العراب والأب الروحي له الفنان الكبير وديع الصافي الذي حضر من لبنان إلى دمشق لتكريمه من جوقة الفرح التي يرعاها الأب الياس الزحلاوي يوم السبت – 28 – 10 – 2000 – ويوم الأحد-29 – 10- 2000 – كانت المعمودية في الكاتدرائية المريمية بدمشق، وكانت القصيدة، فما أجمل الكلمات بحضور الوديع الصافي ،إذ للحروف نكهة أحلى، ومذاق أطيب:
وديع يا ابني اليوم رح وصيك
خلِّي المحبة نور ع جبينك
وخلِّي الوداعة جوهرا بيكفيك
واحفظ وصايا ربَّك ودينك
بدعي يسوع الناصري يحميك
وبدعي العدرا تحرس سنينك
بيَّك الروحي قبلتو بيهديك
واسمو ع طول العمر بيزَيْنَك
لا تكون إلا متل ما بربيك
وشو بتطلب من الرب بيعينك
كلمة الحق إن قلتها بتغنيك
وما في حدا بالحق بيدينك
ونحنا منتوسم يا ابني فيك
للحق تمشي بدرب اشبينك
**عرابك اللي قدَّس بلادي
ومتلو الزمن هيهات لو بيجود
بصوتو السما والجبل والوادي
وفنو ع سابع سما مالو حدود
غنَّى بصوتو البلبل الشادي
وبارك زهور الوطن صارو ورود
وديع رمز الفرح بو فادي
بنور وجهو يحضن المعمود
بصلي يا عدرا تطوِّلي بعمرو
وتحرسيه بهالة الإيمان
لترندح وتار الفرح بالعود
**وديع الله يبارك التنصير
وهالاسم ربي يحفظو يصونو
عرَّابك الصافي القلبو كبير
واللي شموع الروح بعيونو
صلَّى لأم النور حتى تنير
ونادى يسوع يزور ميرونو
من فرحتي -يا بَيي- حسيت بدي طير
ورفرف متل عصفور بعدو زغير
وبوِّس جبين العم بو فادي
وقلو أنا من القلب ممنونو
ليست هناك تعليقات:
إرسال تعليق