إنتي وأنا

شعر الدكتور إياد قحوش

**
ن فتّي على كوخي يا بنّوتي

بيقلب قصر ساعة ما بتفوتي

ومن خاطري بيسرّب الشيطان

و بتقعدي ملْكه بمَلْكوتي

**

ناطر الي ومن عهد أول آخ

هزّ البكي تا ما يفيق صراخ

وعا جمرصدري حاميه السياخ

والاّ شوَي حالف ما بتموتي

**

ولما تفوتي طيف مالو حرف

وبيجرفِك جوعي لَرَسمك جَرف

بتنمّل النقطه التحت الحَرف

من كبر حلم الحب ب بيوتي

**

ولما بحَلاكي بتفشخي جوّا

بيشعل بقلبي التّار من حوا

وبقطفلك التفاح المسوّى

بشجرة لهيبي بأرض جبروتي

**

وأنتي وأنا ع سطيحة الموال

ننفنف غناني مدهدكي بالبال

عا ضو لهبه بتنطفي من خيال

لهتة طفل بالشّوب ملهوتي

**

وبطير فيكي وباخدك مشوار

ع بلاد ما فيها سوى الأشعار

وبصفن بعينيكي متل بَحّار

لاقى بعرض البحر ياقوتي

**

وشدك ع قلبي وبعد ما شدك

برسم بتمي حرق عاخدك

ومابين بَدّي وبين ما بَدّك

تصيري جديلة شعر مفلوتي

**

وزَيّق قميصك ع القمر تزييق

ورشّو ندي من زَهر شقّ شقيق

والزهر فيكي ينبهت ويفيق

وانتي تفيقي فيه مبهوتي

**

ولما ع شرشف مهجتي تنامي

و تنَزلي رخامك على رخامي

مع ضحكتك بتطير أحلامي

الكانت بسجن الشوق مكبوتي

**

وأرشق حنيني عا جرودك خيل

وركضت بليل العاصفه والويل

وسكوتِك الواقف ع باب الليل

دايب شمع عا قونة سكوتي

**

وبيفيق من زهر الأماني العمر

يلمّ الندي الما بين غَمر وغمر

ويشرُد بعنقودك جنون الخمر

ويحنّ دوود القز للتّوتي

**

ونسهَر نزتّ الورد عالمنتور

ونحرق ع وَهج العاطفه بخّور

وأصفى وَشم عا شفّتك محفور

وتصفي بقلبي جروح منحوتي

**

وألطى بعبّك من ليالي البرد

أسردلِك حكايات شَوقي سَرد

ويصير حبك والسهر والورد

عا مدبح العشاق تالوتي

**

وعا كبر الخطيّه بيجي عزريل

بيخنق بحقدو شهقة القنديل

ومن ميل تابوتك عاكتف يشيل

ومن ميل تاني يشيل تابوتي

**

موقع مرمريتا